ಎಲ್ಲೋ ಆರಂಭವಾದ ಒಂದು ಸಣ್ಣ ಒರತೆ
ಹನಿ ಹನಿಗೂಡಿ ತೊರೆಯಾಗಿದೆ
ಕಾಡುಮೇಡುಗಳ ಸುತ್ತಿ
ಧುಮ್ಮಿಕ್ಕುತಾ ಹಾಲಿನ ಹೊಳೆಯಂತೆ
ಹರಿದಿದೆ ಸ್ವಚ್ಚಂದವಾಗಿ

ಮೀಯಬೇಕಿದೆ ಈ ತೊರೆಯ ನೀರಲ್ಲಿ
ತೊಳೆದುಕೊಳ್ಳಬೇಕಿದೆ ಆ ಎಲ್ಲ ಪಾಪಗಳ
ಮನೆ, ಹಳ್ಳಿ ಊರು ಕಟ್ಟಲು
ಕಡಿದು ಕೊಂದ ಮರಗಳ ತಾಪವ
ಅಣೆಕಟ್ಟೆ ಕಟ್ಟಿ ಎಲ್ಲಿಂದ ಎಲ್ಲಿಗೋ
ತಿರುವಿದ ನದಿಗಳ ಶಾಪವ

ಬಿಡಲಾರೆವೆ ನಾವು ಪ್ರಕೃತಿಯ
ಸ್ವಚ್ಚಂದವಾಗಿ ಸೃಷ್ಟಿಯ ಆಸೆಯಂತೆ?
ಮಾಡಲೇ ಬೇಕೇ  ಬಲಾತ್ಕಾರ
ಯಾರೂ ಅರಿಯದ ಭವಿಷ್ಯಕ್ಕಾಗಿ?