ನಾ ಹೇಗೆ ಮರೆಯಲಿ ಆ ದಿನಗಳ

ನಾ ಹೇಗೆ ಮರೆಯಲಿ
ಬೆಳಗಿನಾ ಜಾವದಲಿ
ಸುರಿಯುತ್ತಿದ್ದ ಮಳೆಯಲಿ
ಕೊಪ್ಪೆ ಹಾಕಿಕೊಂಡು
ಶಾಲೆಗೆ ಹೋಗುತ್ತಿದ್ದ ಆ ದಿನಗಳ

ನಾ ಹೇಗೆ ಮರೆಯಲಿ
ಕೆಸರು ದಾರಿಯಲಿ
ಗುಡ್ಡದ ಒಸರಿನಲಿ
ಚಪ್ಪಲಿಯ ಬಿಚ್ಚಿಕೊಂಡು
ಆಟವಾಡುತಿದ್ದ ಆ ದಿನಗಳ

ನಾ ಹೇಗೆ ಮರೆಯಲಿ
ಮಳೆಯ ಬಿಡುವಿನಲಿ,
ಮಾವು ಹಲಸುಗಳಲಿ
ಹೊಟ್ಟೆ ತುಂಬಿಸಿಕೊಂಡು
ತಿರುಗುತಿದ್ದ ಆ ದಿನಗಳ

ನಾ ಹೇಗೆ ಮರೆಯಲಿ
ಬಚ್ಚಲು ಒಲೆಯಲಿ
ಹೊಗೆದಟ್ಟಿ ಬೆಂಕಿಯಲಿ
ಹಲಸಿನಬೀಜ ಹಪ್ಪಳ ಸುಟ್ಟುಕೊಂಡು
ತಿನ್ನುತ್ತಿದ್ದ ಆ ದಿನಗಳ